上星期乐高（Lego）出咗第3个球场系列，LEGO 10299「皇家马德里．班拿贝球场」，庆祝皇马3月6号嘅120周年及班拿贝落成75周年。因为班拿贝球场已经翻新中，盒中模型，变成咗各皇马迷嘅回忆。

小妹有幸第一日就收到呢盒「珍藏」，好想同大家分享一下。贵为乐高十大最多组件之一（第8位），佢有成5876块（比鲁营多300块，比奥脱福多1900块），开箱一下真系吓亲，佢系我砌过最多组件嘅乐高模型。(有兴趣可以睇june嘅开箱片，连结於文章後。)

暂时只系完成咗8成，但已经感受到佢咁多组件，系因为想仔细还原班拿贝外型。班拿贝外面有大型柱趸，低层同古典外墙源自1945年设计，其间一直加建到现时有天花外貌。每砌到一个位，我就有「哗！我去过呢度影相！我坐过呢排！」之类嘅感觉。

睇过3位乐高大师嘅review，都直言3个球场模型入面班拿贝系最有趣，就系因为佢古典外型同衬色（而且我觉得佢系lego第3个球场模型，砌法都有改进）。当然，如果大家唔系皇马或者乐高大建筑物嘅粉丝，佢嘅价钱同埋香港嘅土地问题会令大家却步，但不妨去专门店睇下实物打个卡。