一场皇家马德里主场迎战巴黎圣日耳门，皇马成功反cup，以总比数3:2晋级8强。原本比赛前我都几有信心，因为上场西甲主场大胜皇家苏斯达，但当见到安察洛堤正选名单同上循环一样（除咗停赛嘅卡斯米路同文迪）而唔系上场西甲个阵（有卡马云加（洛迪高），即时担心咗一下，因为上场欧联中场感觉唔够速度同无咩活力，点压制到PSG？ 唯有相信安察洛堤系想出有经验嘅球员。

开波都仲见到皇马攻势，但攻攻下就觉得唔对路，又好似上回合咁攻势唔入肉，又好似连人哋禁区都入唔到。之後安巴比仲个人突破入埋波，总比数落後0:2，真个心都实埋。

不过见到佢第2个「诈糊」时就心谂：睇嚟皇马有运到。然後安察洛堤57分钟就换入卡马云加同洛迪高。我觉得成个中场「开启」返咁，特别系摩迪，free咗，感觉踢世界盃嗰个摩迪又返嚟。摩迪压上去迫抢，再派畀大家射门或者再攻上前，行军顺畅咗。宾斯马都连带受惠，唔使跑到後面帮波，可以做返个9号仔，16 分钟41 秒就反cup成功，而第2 同3 球只隔106秒。再次加冕成为宾球皇/球皇宾救返皇马。

当大家都注意宾斯马同摩迪，我想讲我好欣赏57分钟换上场嘅两名小将卡马云加同洛迪高。当日皇马买唔到安巴比，就引入咗当时psg都想要嘅卡马云加。呢个小将今场出咗33分钟已经成为逆转关键，佢100%成功栏截、93%成功传送加上100%成功长传，令佢控制到个中场，咁摩迪先可以有位跑动。而洛迪高令右边防守同进攻加强（虽然佢系翼，但佢走动配合到右闸卡华查)，令卡华查唔一定要带波到底线斩入去进攻，攻击多咗变化。

第3个入球就系洛迪高中场应接摩迪迫抢psg中圈开嘅波，再直接传畀後上嘅云尼素斯，云尼仔横传畀宾斯马射入。入3球嘅宾斯马，除咗成为「欧联历年最年长的戴帽球员」，仲系皇马最多入球者嘅第3位，有308球咁多，相信下季头甚至今季尾就可以超越鲁尔嘅323 球（基斯坦奴朗拿度450球排第１位）。用两场胜仗嚟庆祝皇马成立120周年，我估皇马高层同球迷都应该收货。

旅皇迷一名。喜欢旅行，喜欢足球；享受在场边摇旗呐喊，经历足球的喜怒哀乐。