夏沙特於2019年夏天嚟到皇家马德里，各球迷都满心期望佢着起皇马7号，可以成为一个真．夏世三。几年後，结果不似预期。依家宾施马突然受伤唞3星期，皇马9月仲有4场比赛，夏沙特可唔可以趁机逆转孭飞呢？

讲番当年，夏沙特（eden hazard）都好惨，未正式出过几场就大伤，由於身价太高，身型微胖，加上手术後脚法因铁板变得无咁灵活，又成日伤到出唔到场，皇迷都大叫佢做「水货」。上季季尾终於决定拎返块固定铁板出嚟，国家队队友古图奥斯亦透露夏沙特好有决心要喺皇马踢出成绩。今季初，教练安察洛堤亦话夏沙特会有重要角色，虽然佢无讲系咩（笑），但亦好老实话唔知夏沙特有几多上阵时间。

其实我都好想夏沙特做返夏神，因为加里夫巴尔、约域离队，皇马无引入前锋，点都希望夏沙特可以帮到球队，无奈系，佢之前每个夏天都同皇迷承诺新一季会畀大家睇到真正嘅夏沙特，大家由期待，到年复年後，好似都冇晒感觉，有啲球迷仲话，唔记得咗有夏沙特呢位球员。

唔知好彩定唔好彩，今届欧联分组赛第1场，宾斯马就因伤离场，谂起热身赛冇咗宾斯马都唔知球队踢紧咩，嗰刻我真系惊咗一惊。结果安察洛堤换入嘅夏沙特除咗几吓甩辘外，见到佢同队友下半场都夹得唔错，又有策划进攻。最後佢个人有1入球1助攻斩获，皇马就以3:0赢些路迪。

夏沙特有冇令大家改观，你又会唔会畀多次机会佢？我真系想讲句：夏神加油！