相信宾斯马於欧联皇家马德里作客车路士再表演帽子戏法後，大家都会认同宾斯马系一位好全能嘅射手。就算之前佢讲笑形容自己系法国跑车亦一啲都唔夸张，不竟佢系第一位喺一季内拎到11个欧联入球嘅法国球员！

当大家发现宾斯马（karim benzema）嘅优点，就开始话宾斯马多年来成全皇马嘅基斯坦奴朗拿度（包括我都有咁觉得），系俾c朗耽误嘅射手。宾斯马反而好谦虚话其实系c朗帮咗佢好多，因为c朗系畀咗最多助攻佢嘅人。有段时间宾斯马俾人嘘，c朗仲让咗个12码畀宾斯马射，希望佢有返信心。

或者系同c朗相辅相成嘅关系，当年宾斯马经常助攻c朗令佢变得更有组织攻势嘅能力，佢嘅无球走位亦为队友带出空位及创造机会。依家嘅宾斯马阅球能力好高，门前把握力又或者系噚晚两个头槌，睇落宾斯马好似就咁一顶就入咗，但咁嘅入球无论角度同时间都要好配合。

宾斯马嘅迫抢能力，亦系一绝，除咗2018年欧联决赛迫抢卡列斯令人印象深刻外，佢今季迫到两位2021年欧洲同欧联最佳龙门（当拿隆马同伊度亚文迪）都要喺自己脚下失波。有球迷话系龙门犯错，但两位世界级门将同样失手，应该要赞宾斯马勤力迫抢系成功嘅。

不过宾斯马表示佢唔系为成为世界第一而踢波，佢享受寻日咁高水平嘅比赛。佢亦唔只一次讲过，佢踢波系畀锺意足球嘅球迷睇。

回顾c朗都离开咗皇马差唔多4年，而两年前宾斯马开始摆脱「宾斯猫」呢个摩连奴畀佢嘅称号，变成帮皇马担大旗嘅狮子，但当年佢都未完全成为一个全能嘅射手，仲依然会门前失机。但今日佢已经喺36场比赛入咗37球，提供咗13个助攻，全能9号嘅踢法，希望足以赢到更多锺意足球嘅球迷喜爱佢。

最後，今场安帅坚持出中场三宝：摩迪、却奥斯同卡斯米路，加上华维迪踢右翼位置，系收到好效果。摩迪噚日控制到中场，无可挑剔，而华维迪绝对系好啱踢右翼，因为佢嘅跑动减少咗三宝要覆盖嘅范围，亦帮轻咗未回覆最佳状态嘅卡华查。下场第二回合皇马主场对车路士，绝对唔可以因为有两球喺手而轻敌，更唔好谂住死守。期待另一场精彩比赛！