预祝大家新年进步！2021年皇家马德里都发生咗好多大大小小嘅事。今日同大家倾吓其中对我印象最深刻嘅两件事，分别就系沙治奥拉莫斯同施丹离队，因为成件事好峰回路转。

拉莫斯离队
沙治奥拉莫斯队长深受球迷欢迎，佢防守出色亦有戴刀待衞嘅花名，系球队嘅关键先生，好多时帮球队绝杀或者扳平都靠佢出色嘅进攻能力，而且佢都好发挥到一个队长嘅角色，激励队员嘅士气！系皇马灵魂人物。

好多球迷都希望佢可以续约而且於皇马退休，可惜佢迟迟未同皇马签约，外媒一直传佢同巴黎圣日耳门洽谈中，佢亦曾经表示叫皇马唔好等佢，唔好将佢放喺下年嘅计划入面。摩迪续约後，突然收到消息，队长想续约但可惜皇马话份合约嘅offer已经到咗deadline冇得续。（我相信啲钱已经用咗嚟签当时拜仁嘅艾拿巴）。此举令到一众球迷，包括唔系好知内情嘅非皇迷，指责皇马好冇人情味。

当然拉莫斯队长唔可以喺皇马退休系好可惜，不过，当华拉尼转会曼联，而开季见到拉莫斯因伤喺psg 都踢唔到几场，就知感情用事系冇用，皇马真系需要一个健康嘅後卫。会长应该系做咗正确选择。

另一件印象深刻嘅，系施丹第二度离职。

2018年基斯坦奴朗拿度走咗後，球队低迷，施丹被邀回归，2019/20年即时赢咗西班牙超级盃同西甲联赛冠军，大部份球迷都好兴奋。而2020/21年球队依然重建中，球迷同埋高层对施丹领军方法睇法两极，西媒仲传出几次最後通牒话再唔赢波就炒施丹。球迷投诉施丹用人存偏见，如唔畀机会後生仔，换人都系垃圾时间，死用宾斯马做正选，同长用中场三宝kcm（却奥斯、卡斯美路、摩迪）。神奇在，球员喺每次媒体传出皇马要炒施丹时，都死拼出好表现，最後欧联杀入4强， 联赛亦只系输俾冠军两分，都算有所交代。

完季後，施丹宣布离职。写咗一封公开信，信中提及自己系一个皇马迷，确实，佢无再执教後都至少两次俾西媒拍到佢同太太到班拿贝睇主场比赛。信中睇到佢对皇迷有不舍之情，因为佢提及感受到球迷对佢嘅爱戴。另外，佢亦指出佢不满媒体一直发放攻击佢嘅讯息，同埋表示自己明白高级联赛嘅游戏规则，要赢先可以留低。

佢嘅告别信中交代离开原因，系因为觉得球队需要重建，但佢再感觉唔到管理层嘅信任。佢亦警示各球队应重新审视唔赢就炒领队嘅生态，同埋媒体负面新闻炒作风气，希望佢哋可以更专注讲足球。

施丹系咪真系咁差？我绝对唔同意，选人方面，如云尼素斯、洛迪高同华维迪都系施丹常用嘅後生仔，而老实讲安察洛堤依家都一样用紧宾斯马同中场三宝，但安帅赢波就当然无咁多球迷或高层投诉，而且安帅换人时间都比较正路，令人觉得其实球员都有机会。

当然大大小小事件仲有以下呢啲：

——欧洲超级联赛宣布成立，皇马及其会长佩雷斯随即受靶，但最後uefa被欧洲上诉法院裁定4月对其颁布嘅禁制令为有效，即不能对参加球队作出惩罚。

——uefa欧联16强因技术问题重抽，皇马对手由宾菲加变成巴黎圣日耳门。安帅表示强队迟早都会遇到。

—— 安察洛堤回归，皇马暂时15场不败。

—— 云尼素斯季初大爆发，据悉系安帅叫古图奥斯俾前锋入吓波，提升佢哋信心。

——宾施马被控勒索国家队友罪名成立，正上诉中。法国国家队一反常态，由当初即时唔畀佢踢国家队，到依家表示会继续用佢。

——宾施马争夺金球奖排第4，史上最高名次。

——年底疫情爆发，多於12名皇马球员确诊。疫情近日变种再蔓延，无论西甲定英超都一路传出球员确诊消息。

希望新一年睇波唔会又再次受影响。喺呢度再预祝大家2022年新年进步，平安，健康，快乐；继续欣赏好球赛。